طباعة أرسال لصديق

محمد عبدالله أبوالعطا يرسل رسالة إلى شرم الشيخ

 من غير تحيه

و من غير سلام

اقرا جوابي

أنا مواطن

مفقوع من فخامتك

و في كلامي ناوي

أجي على كرامتك

** 

من غير محبه

و من غير وئام

خساره في اللي زيك

دعاء بالشفا

أو كلمة سلامتك

**

قبل يناير

و قبل اللي كان

كنا بندعي عليك

بالليالي

و دلوقتي بس

و بعد رحيلك

بندعي عليك

يأخر قيامتك

**

يمكن تحس

بحبة عذاب

و حبة أنين

حبة ضمير

حتى لو مجروحين

م اللي دوقته لشعبك

**

مش هحكي كتير

عن شعر في عمايلك

كتير قالوا قبلي

و وصفوا في رزايلك

**

هاحكيلك عن عينيه

اللي استنت جنابك

في الميدان بالساعات

نستنى ساعات

الصبح نقول هيطلع

الضهر نقول خلاص

العصر نكون تعبنا و رفعنا الرايات

و في انصاص الليالي

تطلع مستخبي

في ضي الشاشات

تقول و تعيد

نفس الحكايات

اخواني

اخواتي

ابنائي

...................

**

مش رايدك أبويا

هي الأبوه غصب

و لو كنت أبويا

كان يبقى اليتم أكرم

من ان عيشة أبويا

تبقى أساسها نصب

**

ارحل يا ريس

سأقيل الحكومه

ارحل يا حسني

فسأفوض سليمان

ارحل يا زفت

قررت التخلي

جيت على نفسك

مفيش داعي

خلي

**

و كل ده مش عاوزني اتفقع

قالولي انت قله

ذل و مهانه و شرفنا وقع

قالوا حالنا فله

انتو اللي فله

هي دماغكو ملبن

و احنا اللي دماغنا قله

**

بأكره عظمتك

في سري شتمتك

و في جهري شتمتك

و فاكر اني ارتحت و هزمتك

تبقى عبيط

**

مش هتنفعك حراستك

من قضا ربي و ربك

لما يجيك الموت

و العساكر جنبك

ابقى قولهم يحموك

و يكفروا ذنبك

و اابقى وصيهم

يشتروا كفنك

حرير مرصع

و اللي بيبني قبرك

هناك ع الخليج

خليه يوسع

و أوعدك يا باشا

لما يجيني خبرك

مش هصرخ

هرجع

يمكن تحس في موتك بضيق

أو يمكن تزعل مني و ترجع